Бишкекте лифтке кыпчылып каза болгон жарандын окуясы боюнча ведомстволор аралык комиссия түзүлдү

Бишкекте лифтке кыпчылып каза болгон жарандын окуясы боюнча иликтөө үчүн ведомстволор аралык комиссия түзүлдү. Бул тууралуу Бишкек шаардык мэриясынан билдиришти.

"Улан-1 кичи районундагы көп кабаттуу үйдөгү лифтте бир адам каза болгону белгилүү болоору менен «Бишкекшаарлифт» муниципалдык ишканасынын жетекчилери жана Энергетика министрлигине караштуу Өнөр-жай коопсуздугу боюнча мамлекеттик экологиялык инспекциянын өкүлү окуя болгон жерге барды.
Алар келгенге чейин лифт-оператор инструкцияга ылайык лифттин тогун өчүрүп, жабырлануучуну эвакуациялоо үчүн электромеханикти чакырган. Кырсыкты иликтөө жол-жобосуна ылайык, борбор калаанын мэриясы тарабынан ведомстволор аралык комиссия түзүлүп, анын курамына «Бишкекшаарлифт» муниципалдык ишканасынын, Октябрь акимиатынын, Энергетика министрлигине караштуу Энергетика, тоо-кен көзөмөлү жана өнөр-жай коопсуздугу боюнча мамлекеттик инспекциясынын жана РИИБдин өкүлдөрү кирди.

Комиссия окуя болгон жерге экспертиза жүргүзүп, соттук-медициналык экспертизанын жыйынтыгын эске алуу менен анын корутундусун даярдайт. Окуяны укук коргоо органдары да иликтейт", - деп жазылат маалыматта.