Бишкектеги жаңы конуштардын тургундарына 1 миң 81 техникалык паспорт берилди

Бишкектеги жаңы конуштардын тургундарына турак жайы үчүн 1 миң 81 техникалык паспорт берилди. Бул тууралуу мэриянын басма сөз кызматынан билдиришти.

"Кадастр" мамлекеттик ишканасынын маалыматы боюнча, Жер-Ынтымагы, Ала-Тоо, Дордой, Арча-Бешик, Керамик, Төкөлдөш, Ак-Ордо, 2-Черепки, Кара-Жыгач, Тынчтык, Учкун конуштарынан кайрылуу түшкөн.

Эске салсак, техникалык паспортторду берүү боюнча мобилдик топтор 7-декабрдан тарта ишин баштаган.

Көчмө бригадалары өз алдынча турак-жай курулган жер тилкелерине изилдөө жүргүзүп, андан соң техникалык паспорт даярдашат. Жарандар ошондой эле түз эле Мамкаттоого кайрылып, техникалык паспорт даярдоо үчүн арыз калтырса болот.

Автор: Жылдыз Джускембаева