"Зыяратчылардын акчасын жана убактысын үнөмдөөгө шарт түзөт". Бишкектен алгачкы жолу Сауд Арабиясына каттам аткарылды

6-февралга караган түнү "Эйр Манас" ата мекендик авиакомпаниясы тарабынан Бишкектен Жидда шаарына биринчи чартердик каттам учту. Бул туурасында "Манас" эл аралык аэропортунан кабарлашты.

Маалым болгондой, "Эйр Манас" авиакомпаниясы Кыргыз өлкөсүнүн Сауд Арабия падышачылыгындагы биринчи оператору болуп дайындалып, Бишкек-Жидда-Бишкек багыты боюнча аптасына бир жолу (жекшемби) каттамдарды аткарат. Ал эми февраль айынын аягынан баштап аптасына төрт каттамга чейин көбөйөт.

"Түз аба каттамды ачуу аземине "Манас" эл аралык аэропортунун директору Талгат Нурбаев жана өкүлдөрү, Транспорт жана коммуникациялар министринин биринчи орун басары Алмаз Турганбаев, Кыргыз мамлекетинин Сауд Арабиядагы элчиси Улукбек Марипов жана Сауд Арабия падышачылыгынын Кыргыз жергесиндеги элчиси Абдурахман бин Саид Аль-Жумабаев катышты.

Бишкек-Жидда түз авиакаттамынын ачылышы эки өлкөнүн мамилесин чыңдоого, туристтердин санын көбөйтүүгө, ошондой эле зыяратчыларыбыздын акчасын жана убактысын үнөмдөөгө шарт түзөт. Ошондой эле Сауд Арабиянын башка шаарларынан да каттамдарды ачуу пландалууда", - деп билдирди Улукбек Марипов.

Автор: Бактыгүл Момбекова
Фото: "Манас" эл аралык аэропорту