Украинада кыз алты жыл мурун жоголгон энесинин сөөгүн үйүнүн балконунан тапты

Киев шаарынын Соломенский районундагы көп кабаттуу үйдүн балконундагы бетон кутучадан мындан алты жыл мурун жоголгон энесинин сөөгүн кызы таап алды. Бул тууралуу чет элдик басылмалар жазып чыгышты.

Маалыматка ылайык, 2016-жылы дайынсыз жоголгон Оксана Сивактын 29 жаштагы кызы 13-февраль күнү 9 кабаттуу үйдүн 5-кабатында жайгашкан апасынын батирин оңдоп-түзөө иштерин жүргүзө баштаган. Ал үйдүн балконун жыйнап жатып, таштандынын астынан бетон менен толтурулган узун кутучаны көргөн. Андан жыт чыккандыктан дароо полицияга кабарлаган.

Ал дайынсыз жоголгон апасынын сөөгү кутунун ичинде болушу мүмкүн деп шектенген. Окуя болгон жерге келген куткаруучулар жана полиция кызматкерлери кутудан Оксана Сивактын мумияланган сөөгүн табышкан.

Учурда өлүмдүн себеби белгисиз, аны соттук-медициналык экспертиза аныктайт.

Оксана Сивак жоголгон учурда 43 жашта болчу. Ал 2016-жылдын 2-январь күнү үйүнөн чыгып кеткен бойдон дайынсыз жоголгон. Аны ким өлтүргөндүгү белгисиз. Полиция кызматкерлери ал жолугуп жүргөн эркек адамды суракка алууну пландоодо.

Автор: Азат Бейшенбеков