Орус аскерлерине Украинага басып кирүүгө буйрук берилгени айтылды

Америкалык CBS телеканалы атын атагысы келбеген америкалык аткаминерге таянып, Орусиянын аскерий командачылыгы Украинага басып кирүүгө буйрук алганын ырастады. Бул тууралуу чет элдик маалымат булактары жазышты.

"Бизде орус аскерлерине Украинага басып кирүүгө буйрук берилгени тууралуу чалгын маалыматтары бар", - деп айтылган телеканалдын маалыматында.

Мындан тышкары, жер-жерлерде командирлерге согуш талаасынын өз секторлорунда конкреттүү маневрлерди иштеп чыгуу милдети жүктөлгөнү айтылды.

Ал арада Орусиянын Коргоо министрлигиндеги жакын булак РИА Новости басылмасына CBS телеканалынын маалыматын келесоолук деп атады.

"Бул "сенсациянын" авторлору президент Жо Байденди өздөрүнүн фантазиялары менен келесоо абалга келтиришти. Байден өткөн жуманын башында орус аскерлери Украинага 16-февраль күнү басып кириши керек деп билдирген. Аны Американын чалгындоо кызматы дагы тастыктап, баары даяр экенин билдирген. Америкалык чалгын кызматтары "баскынчылык" башталган 16-февралдан дээрлик бир жума өткөндөн кийин орус командирлери "өз иш-аракеттерин пландап" баштаган имиш", - деген Коргоо министрлигиндеги булак.

Анын айтымында, Орусиянын куралдуу күчтөрүндө баары таптакыр башкача уюштурулган.

"Ошондуктан америкалык маалымат каражаттарынын бул келесоолугу эч нерсеге алып келбейт", - деп жыйынтыктаган өздүк булактар.

Автор: Азат Бейшенбеков