Миңден ашык баатыр энени сыйлаган Камчыбек Ташиев: "Сыйлоо салтанатын эми балдарым улантат"

Бүгүн, 8-мартта УКМКнын төрагасы Камчыбек Ташиев тарабынан баатыр энелерди сыйлоо аземи өткөрүлдү. Жалал-Абад шаарында уюштурулган майрамдык иш-чарага миңден ашык баатыр эне катышып, сыйланды.

"Урматтуу баатыр энелер, сиздерди биз ар дайым башыбызга бийик көтөрүп сыйлоого милдеттүүбүз. Дээрлик 30 жылдан бери сиздерди 8-март күнү бир аз болсо да маанайыңыздарды көтөрүп, ак батаңыздарды алууга аракет кылып келдим. Эми бул саамалыкты келээрки жылдан баштап менин уулдарым улантат. Балдарым дагы энелерди сыйлаганды, апаларга урмат-сый көрсөткөндү үйрөндү деп ойлойм. Балдарымдын балдары дагы күнү келгенде бул салтты улантып кетсин. Түбөлүктүү болуп, баатыр энелерди сыйлоо салты улансын. Ак батаңыздарды бериңиздер...", - деди Камчыбек Ташиев.

Майрамдык иш-чара дүйнөдөн көзү өткөн жалпы энелерге, баатыр энелерге куран окуу менен башталды.

Салтанатка белгилүү өнөр адамдары да катышып, апаларга ыр белектерин тартуулашты.

Автор: Бактыгүл Момбекова
Фото: Өткүрбек Рахманов