Жогорку Кеңештин төрагасы баштаган депутаттар Аксы окуясынын курмандыктарын эскеришти

Бүгүн, 17-мартта төрага Талант Мамытов баштаган Жогорку Кеңештин депутаттары Аксы окуясында каза болгондорду эскерди. Бул тууралуу парламенттин басма сөз кызматынан билдиришти.

"Ала-Тоо" аянтындагы 2002-жылдагы Аксы жана 2010-жылдагы Апрель окуяларында курман болгондорго арналып тургузулган монументке гүлчамбар коюшту.

Белгилей кетсек, 2002-жылдын 17-мартында Аксы районунун тургундары ошол учурдагы бийликтин туура эмес жүргүзгөн саясатына каршы чыгып, нааразычылык билдиришкен. Натыйжада жергиликтүү элге ок атылып, алты адам каза болгон жана бир тобу жаракат алган.

Автор: Жылдыз Джускембаева