Казак кримтөбөлү Дикий Армандын камактагы мөөнөтү узартылды

Казакстанда январь айындагы баш аламандыкта кармалган Дикий Арман деген каймана ат менен таанымал Арман Жумагелдиевдин камактагы мөөнөтү узартылды. Казак басылмаларынын маалыматына караганда, Алматы шаардык соту Жумагелдиевди кармоо мөөнөтүн 7-июнга чейин узартты.

Казакстандын Башкы прокуратурасынын маалыматына ылайык, Жумагелдиев 3 берене (ок атуучу куралдарды, ок-дарыларды, жарылуучу заттарды же жардыргыч түзүлүштөрдү мыйзамсыз алуу, берүү, сатуу, сактоо, ташуу же алып жүрүү; массалык баш аламандыкка катышуу; адамды эркиндигинен мыйзамсыз ажыратуу, байкабастыктан жабырлануучунун өлүмүнө же башка оор кесепеттерге алып келүү) боюнча шектелүүдө.

Белгилей кетсек, Арман Жумагелдиев 7-январда Казакстанда кармалган. Андан кийин ал кыргыз модели Айкөл Аликжанованын жолдошу экендиги айтылган. Кийинчерээк ал абактан качып кетти деген маалыматтар тараган.

Автор: Бактыгүл Момбекова