Арменияда Никол Пашиняндын отставкасын талап кылгандар митингге чыгышты

Арменияда премьер-министр Никол Пашиняндын отставкасын талап кылган оппозициялык күчтөрдүн митинги орун алууда. Бул тууралуу чет элдик басылмалар жазып чыгышты.

Маалыматка ылайык, нааразычылык акциялардын жаралуусуна Никол Пашиняндын эки апта мурун Тоолуу Карабах боюнча тараткан билдирүүсү себеп болгон. Премьер-министр анда "Дүйнө коомчулугу армян тарап Тоолуу Карабах аймагынын макамына байланышкан талаптарды азайтат деп күтүп жатышат" деген пикирин билдирген.

Ал эми оппозиция өкүлдөрү Армениянын азыркы бийлигин Тоолуу Карабах маселеси боюнча Азербайжанга жеңилдиктерди түзүп берүүнү көздөп жатат деп айыптоодо. Ошондой эле алар Пашиняндын жогорудагы маселени чечүү үчүн эч кандай укугу жана бийлиги жок экендигин айтып, тез арада отставкага кетүүсүн талап кылып жатышканы кабарланды.

Учурда Ереван шаарындагы Франция аянтына топтолгон миңдеген эл чатырларды тигип, нааразычылык акциясын күндөп-түндөп улантууга камынып жатышканы айтылууда. Алардын арасында тартип сакчылары менен да кагылышууларга баргандар бар экени белгилүү болду. Мындан тышкары митингге чыккандар көчөлөрдү ээлеп, жол кыймылын чектеп жатышканы да маалымдалды.

Белгилей кетсек, Никол Пашинян премьер-министрлик кызматты 2018-жылдан бери аркалап келет.

Автор: Жанбулат Жумабеков