Түркия президентинин администрациясынын өкүлү: "Түрк өлкөлөрү маалыматтык чабуулга чогуу каршы турушу керек"

Түркиянын Стамбул шаарында 13-15-май күндөрү Түрк мамлекеттери уюмунун (ТМУ) жогорку расмий өкүлдөрүнүн, медиа жана маалыматка жооптуу министрлеринин 4-жыйыны өттү. Иш-чараны Түркия президентинин администрациясынын Коммуникация башкармалыгы уюштурду.

"Акыркы жылдары түрк мамлекеттеринде жана ага жакын аймактарда орун алган окуялар түрк биримдигинин маанилүү жана зарыл экенин дагы бир жолу көрсөттү", - деди жыйында Түркия президентинин администрациясынын Байланыш башкармалыгынын жетекчиси Фахреттин Алтун.

Түрк мамлекеттери уюмунун негизи 2009-жылы Азербайжанда түптөлгөнүн, 2021-жылга чейин түзүм Түрк тилдүү мамлекеттердин кызматташтык кеңеши деп аталып келгенин белгиледи.

Былтыр Стамбулда өткөн саммиттин жыйынтыгында Түрк мамлекеттери уюму деп өзгөртүлгөн.

Алтун ошондой эле заманбап дүйнөдө түрк мамлекеттери кабыла турган маалыматтык чабуулдар тууралуу да айтты.

"Биздин өлкөлөр эл аралык аренада маалыматтык чабуул жана жалган маалыматтарга каршы турушу керек болот. Ийгиликке жетишүү үчүн күчүбүздү бириктирүүбүз керек. Натыйжалуу ыкмаларды колдонуу, жалган маалыматка каршы алдын ала биргелешип кадам таштоо зарыл", - деди ал.

Автор: Автандил Добулбеков