Бишкекте токтоп турган Mercedes Benz Sprinter унаасын айдап качууга шектүү кармалды

Бишкек шаарында Mercedes Benz Sprinter жүк ташуучу унааны айдап качууга шектүү жаран кармалды. Бул тууралуу Ленин райондук ички иштер бөлүмүнөн билдиришти.

Билдирүүгө ылайык, 19-май күнү милицияга борбор калаанын тургуну К.А. аттуу жаран арыз менен кайрылган. Арызында ал ошол эле күнү саат 16:00дө Калык Акиев көчөсүндө Mercedes Benz Sprinter унаасын уурдап кетишкендигин билдирген.

Бул факты боюнча Кылмыш-жаза кодекстин 211-беренеси (автотранспорт каражатын уурдоо) боюнча кылмыш иши козголгон.

Жүргүзүлгөн иликтөө жана ыкчам-издөө иш-чараларынын жүрүшүндө кылмышка шектүү катары 1976-жылы туулган К.А. аттуу жаран кармалган.

Кармалган жаран СИЗО-1ге киргизилди. Козголгон кылмыш ишинин алкагында уурдалган унаа арыз ээсине кайтарылып берилди.

Автор: Азат Бейшенбеков