Депутат: "Акылбек Жапаровдун оозунан миллиард эле чыга берет, эч качан миллион чыкпайт"

Бүгүн, 22-июнда Жогорку Кеңеште "Кыргызстандагы оюн-зоок иши жөнүндө" жана "Оюн-зоок ишинин маселелери боюнча айрым актыларына өзгөртүү киргизүү жөнүндө" мыйзам долбоору добуш берүүгө коюлду. Анда 6 депутат добуш берүүдөн баш тартты.

Эл өкүлү Адахан Мадумаров мыйзам долбооруна каршылыгын билдирип жатып "биздин позиция кумарсыз Кыргызстан" дейт.

"Урматтуу кесиптештер, сиздерге кайрылам, кыргыздын жакшынакай каада-салты бар. Эч качан кумарга жакындаба дейт. Кумар жакшылыкка алып келбейт. Мүмкүн канча бир акча... Акылбек Жапаровдун оозунан миллиард эле чыга берет, эч качан миллион чыкпайт. Келбейт андай акча. Мына Филиппин менен Таиландды мисал кыла берет. Биз кумаркананын айынан келип чыга турган апааттардан этият бололу деп жатабыз. Биз позициябызды ачык билдирдик, ошондуктан кумарсыз Кыргызстан болуш керек. Сойкукана, жетимкана, кумарканасы жок өлкөгө айланышыбыз керек", - деди ал.

Автор: Бактыгүл Момбекова