Нарында мал издеп кеткен боюнча дайынсыз жоголгон 50 жаштагы жаран изделүүдө

Нарында мал издеп кеткен боюнча дайынсыз жоголгон 50 жаштагы адам изделүүдө. Бул тууралуу Өзгөчө кырдаалдар министрлигинен билдиришти.

Маалыматка ылайык, кечээ, 28-июнда Ат-Башы районундагы Өзгөрүш айыл аймагына караштуу Жаңы-Жер жайлоосунун Кичи-Каманды тилкесинде 1972-жылы туулган И.К. аттуу жаран мал издеп кеткен боюнча кайтып келген эмес. Жоголгон жарандын минип жүргөн аты келип, өзү табылбай жаткандыгы тууралуу маалыматты кошунасы билдирген.

Учурда издөө иштерине Ат-Башы райондук №45 Өзгөчө кырдаалдар башкармалыгынан 10 куткаруучу, Ички иштер министрлигинен 10 кызматкер жана жергиликтүү тургундардан 5 адам тартылганы маалымдалды.