Француздар да келишти... "Шамбала" тасмасы Парижде көрсөтүлдү

Бир нече эл аралык сыйлыктарга татыган "Шамбала" тасмасы Францияда көрсөтүлдү. Режиссёр Артыкпай Сүйүндүковдун тасмасын көрүүгө Франциядагы кыргыздар эле эмес, француздар да келишти.

Бул туурасында Кыргызстандын аталган өлкөдөгү элчиси Садык Шер-Нияз билдирип, көрүүчүлөр аз келеби деп кооптонгонун жашырган жок.

"Шамбаланы" Парижден көрсөтүп алдык. Эл аз келеби деп кооптондум эле. Тескерисинче, билеттер көп сатылып, "Линкольн" кинотеатры эң чоң залын бериптир. Кыргыз, француз аралашкан эл болду. Бул жакта ЮНЕСКОнун чакыруусу менен жүргөн билим берүү министрибиз Алмаз Бейшеналиев да келип катышып кетти.

Уюштуруучуларга, колдоо көрсөткөндөргө чоң ырахмат. Ынтымак болсо мындай майрам Парижде дагы далай өтөт деген ойдомун", - дейт элчи.

Белгилей кетсек, "Шамбала" тасмасы белгилүү жазуучу Чыңгыз Айтматовдун "Ак кеме" повестинин негизинде тартылган. Ал буга чейин КМШ чөлкөмүндөгү эң мыкты тасма аталып, Орусиянын "Ника" киносыйлыгын жеңип алган. "Оскар" киносыйлыгына да көрсөтүлгөн. Бүгүнкү күндө аталган тасма эл аралык 30 сыйлыкка ээ болду.

Автор: Бактыгүл Момбекова
Фото: Садык Шер-Нияз