Министр Улан Ниязбеков Кытайдын Кыргызстандагы элчиси менен жолукту

Ички иштер министри Улан Ниязбеков Кытай Эл Республикасынын Кыргызстандагы атайын жана ыйгарым укуктуу элчиси Ду Дэвэнь менен жолугушту.

Министрликтин маалыматына караганда, Ниязбеков Кытай Эл Республикасынын Кыргызстандагы элчилиги өлкөдөгү ички иштер органдарынын ишенимдүү жана туруктуу өнөктөштөрүнүн бири экенин белгиледи.

"Кызматташтык мезгилинде элчилик тарабынан ички иштер органдарынын коомдук коопсуздукту камсыздоодо жана кылмыштуулукка каршы күрөшүүдө потенциалын күчөтүүгө олуттуу салым кошулду. Айрыкча, материалдык-техникалык жактан көмөк көрсөтүү боюнча бир топ жакшы мамилелер түзүлгөн. Мындан тышкары биз Кытайдын Коомдук коопсуздук министрлиги менен кызматташтыктын жогорку деңгээлине жеткенибизди чоң кубаныч менен белгилейбиз", - деди Улан Ниязбеков.

Ошондой эле ал өз ара аракеттенүүнү андан ары өнүктүрүүгө жана кеңейтүүгө даяр экенин тастыктады.

Элчи Ду Дэвэнь Кытай жарандарынын элчиликке кайрылууларынын санынын азайгандыгы боюнча оң тенденция бар экенин, бул ички иштер органдарынын жакшы координацияланган ишинин натыйжасы экенин белгиледи. Ошондой эле кызматташууну мындан ары өнүктүрүүгө жана кеңейтүүгө даяр экенин ырастады.

Жолугушуунун жүрүшүндө пикир алмашуу болуп, тиешелүү маселелер талкууланды. Ошондой эле кыргыз-кытай мамилелерин мындан ары чыңдоо маселелери каралды.

Автор: Айжанар Рыспек кызы
Фото: ИИМ