Өзбекстанда тери заводунун иштешине каршы болгон адам өзүн өрттөп жиберди (видео)

Өзбекстандын Карши шаарында булгаары заводунун иштешине каршылыгын билдирген жаран өзүн ишкананын алдында бензин чачып өрттөп жиберди. Мындай видео социалдык тармактарга тарады.

Маалыматка ылайык, ишкананын иштешине каршылыгын билдирип бир нече адам чыккан. Алардын айтымында булгаары заводдон жаман жыт чыгат. Видеодо бир жигит аны фабриканын администрациясынын өкүлдөрү, тагыраак айтканда, Акмал аттуу адам коркутканын айткан.

"Ушул Акмал үчүн жашагым келбейт" деп кыйкырып өзүнө бензин чачып өрттөгөн ал. Чогулган эл өрттү өчүрүүгө жетишкен. Жабырлануучунун андан аркы тагдыры тууралуу маалымат жок.

Өзбекстандын Башкы прокуратурасы бул боюнча тергөө ишин баштады.

Бул Өзбекстанда ушул айдын башынан бери ачыкка чыккан экинчи өзүн-өзү өрттөө окуясы. 2-августта Фергана мунай заводунун кызматкери Санобархан Хайдарова өзүн өзү өрттөп жиберген. Ал ооруканада 10-августта каза болгон.