Алымкадыр Бейшеналиев: "Алтын балалыкты" жаптырбай алып калдым

Мурдагы саламаттыкты сактоо министри Алымкадыр Бейшеналиев Түркиядан кайтып келип, “Алтын балалык” реабилитациялык борборунун жетекчилик кызматын аркалоодо. Бул тууралуу маалыматты SUPER.KG порталына өзү тастыктады.

“Түркияга иштер менен 2 күнгө эле барып келдим. Азыр "Алтын балалыкта" кызматымды аркалап жатам. Мен жок болсом бул жактагы ишти ким кылат? "Алтын балалыкты" дагы жабуу аракети болгон, мен жаптырбай алып калдым”, - деди ал.

Эске салсак, Алымкадыр Бейшеналиев 2-июнда Башкы прокуратура тарабынан кармалган. Андан кийин министр тергөө иштерине байланыштуу убактылуу кызматтан четтетилип, 1 айга СИЗОго камакка алынып, кийин кайра үй камагына чыгарылган. Жактоочу Алымкадыр Бейшеналиевдин ишинде материалдык чыгым табылбаганын билдирген. 16-августта Бейшеналиевдин аракетинде кылмыштын курамы жок болгондуктан ага карата козголгон кылмыш иши кыскартылган. 19-августта саламаттыкты сактоо министри кызматынан бошотулуп, ошол эле күнү Ысык-Көлдүн Чолпон-Ата шаарындагы "Алтын балалык" реабилитациялык борборунун директору болуп дайындалган.