Эне жана баланы коргоо борборунда Баткенден келген 5 балага операция жасалды

Учурда Эне жана баланы коргоо улуттук борборунда чек арадагы куралдуу кагылышууда жаракат алган 8 бейтап дарыланууда. Алардын алтоо кичинекей бала. Бул тууралуу аталган борбордун жетекчиси Гүлзат Маймеровага байланышканыбызда билдирди.

Анын айтымына караганда, кечээ 5 балага операция жасалды.

"Бизге түшкөн балдардын эң кичинекейи 9 айлык, эң чоңу 11 жашта. Кечээ 5 балага, бир чоң кишиге операция жасалды. Абалдары орто оор. 9 айлык наристе травматикалык шок алган", - деди Маймерова.

Белгилей кетсек, кыргыз-тажик чек арасындагы куралдуу кагылышуудан жабыркап, ооруканага кайрылгандардын саны 103кө жетти.

Автор: Айжанар Рыспек кызы