Түркстанда Кыргыз-Казак интеллигенциясынын V форуму өттү

Түркстанда Кыргыз-Казак интеллигенциясынын V форуму өттү. Бул тууралуу SUPER.KG порталына Нурдин Усеев билдирди.

Маалыматка ылайык, казак окумуштуусу Бекасыл Биболатулынын 200 жылдыгына арналган форум 17-сентябрда Эл аралык Түрк академиясынын колдоосу менен Түркстан облусунун Төлөби районунун Кенесарык айылында болуп өттү. Ага Казакстан президентинин кеңешчиси Малик Отарбаев, Межилистин депутаты Сауытбек Абдрахманов, Эл акыны Кожогелди Култегин жана Жогорку Кеңештин экс-спикери Зайнидин Курманов баштаган кыргыз делегациясы, эки өлкөнүн белгилүү окумуштуулары, академиктери, илимий институттарынын жетекчилери, интеллигенция өкүлдөрү жана журналисттер катышты.

"Форумда Түрк академиясы тарабынан басылып чыккан Бекасыл Биболатулынын «Зикзал», кыргыз элинин «Эр Эшим», белгилүү түрколог, профессор Кадыралы Конкобаевдин редакторлугу менен казак тилине которулган «Эр Эшим», «Жаныш-Байыш» аттуу баатырдык эпостор тууралуу сөз болду. 19-кылымда жашаган окумуштуу Бекасыл Биболатулы Ташкент, Самарканд, Бухара, Карнак жана Сайрам шаарларында, Сирия өлкөсүндө билим алган. Теологияны терең билген Бекасыл Биболатулы астрономия, математика жана философияны терең үйрөнүп, шыпаачылык өнөрү менен да белгилүү болгон. Анын бул тармактардагы эмгектери “Зикзал” китеби аркылуу бүгүнкү муунга жетип отурат", - деп белгиледи Нурдин Усеев.

Белгилей кетсек, уюмдун төртүнчү жолугушуусу 2019-жылы Казакстандын президенти Касым-Жомарт Токаевдин Кыргызстанга расмий сапарынын алдында Бишкекте өткөн.

Автор: Жолдубек Качкынбаев
Фото: Нурдин Усеев