Тажикстандын агрессиясы. Баткенде зыянга учураган үйлөрдүн курулушу эки күндөн кийин башталат

Тажикстандын Кыргызстанга куралдуу кол салуусунан зыянга учураган турак жайлардын курулушу эки күндөн кийин башталат. Бул тууралуу бүгүн президенттин администрациясынын башкармалыгынын башчысы Айбек Жунушалиев Баткенге болгон иш сапарынын алкагында билдирди.

Маалымдалгандай, ведомстволор аралык комиссия өзүнүн ишин тез арада аяктап, 26-сентябрдан баштап турак жайларды сала баштайт. Курулуштар толугу менен республикалык бюджеттен каржыланат.

“Зыянга учураган турак жайларды эл аралык уюмдардын өкүлдөрү көрүп кетишти. Биринчи күндөн баштап курулуш техникалары келип баштайт. Үйлөр салынганда да кирпич менен салынат. Үстү монолит менен жабылат. Бүт эски үйлөр алынат да, жаңы имараттар тургузулат”, - деп билдирди Жунушалиев.

14-17-сентябрь күндөрү тажик тараптын куралдуу кол салуусунан улам Кыргызстандын 62 жараны мерт кетти. Жабыркагандар 200гө чамаласа, 140 миңге жакын адам коопсуз жайга эвакуацияланды.

Автор: Максуда Кудайбердиева