Бүгүн эстрада ырчысы Айгерим Расул кызы 31 жашка толду. Ал 1991-жылы 10-октябрда Бишкек шаарында туулган. 2009-жылы мектепти аяктап, Бүбүсара Бейшеналиева атындагы Кыргыз мамлекеттик искусство институтуна тапшырган. 3 жашынан баштап атасы Расул Маматкулов менен бирге чоң сахнага бийлеп чыга баштап, кийин жеке ырчы катары "Түнкү Бишкек" аттуу ыры менен элге таанылган.
"Фотоальбом" рубрикасында ырчынын кичинекей, секелек, бой жеткен жана учурдагы сүрөттөрүнө саресеп салабыз.
"Супер-Инфо" гезитине берген маегинен үзүндүлөр:
- "Инстаграмдагы баракчама чыгармачылыгыма байланыштуу гана видеолорду, сүрөттөрдү жүктөйм. Жеке жашоомдогу көрүнүштөрдү элге жарыялагым келбейт. Күн сайын ар бир кадамымды сүрөткө тартып, социалдык тармактагы баракчама киргизүү мен үчүн ыңгайсыз. Реалдуу жашоодо жашабай эле интернет үчүн жашагандай болуп каласың. Мен тажаткандардын катарына кирбейм. Тажаткандар башкалар".
-
"Жашоодо адам болуп калыптанышыма атамдын ролу чоң. Чыгармачылыкка болгон табитим, мүнөзүм атама окшош. Бир сөз менен айтканда, атам мен үчүн – хан. Ал мени эркек баладай намыскөй кылып тарбиялады. Ошондон уламбы, ата-энемдин алдында өзүмдү эркек баласындай көп нерсеге милдеттүүдөй сезем. Атанын мээрими менен чоңойгон кыз бала бактылуу болот деп коюшат эмеспи. Атам мээримден өксүтпөгөнү үчүн бактылуумун. “Эгерде сеники туура болсо эч качан артка кайтпа, өзүңдүкүн бербе.
-
Башыңды бийик көтөрүп жүр” деген насааттарын көп айтты. Ар дайым “өзүңдү татыктуу алып жүр” дечү. Кээде туура эмес иш кылсам, мага сүйлөбөй коюп жазалачу. Сүйлөбөй калганда кабак-кашын карап бир нерсеге таарынып калганын түшүнөм. Андайда дароо көңүлүн алганга аракет кылам. Жанына барып “эмне болду? Туура эмес кылдымбы? Туура эмес кылсам кечирип коюңуз” дейм. Ал мен үчүн идеалдуу ата. Бизге бир да жолу кол көтөргөн жок. Жумшак сүйлөп чоңойтту. Жини келсе көзү менен эле бизди түзөп, ордубузга койчу".
- "Мен жөнүндө ушактарга жолдошум көнүп бүттү, азыр андайларга такыр көңүл бурбайт. Азамат экөөбүз үйлөнө электе эле мен тууралуу айтылган ушак-кептерди изилдеп чыккан экен. Баары куру сөз, жалган жалаа экенин ошондо эле билген. Ал өзү да орган кызматкери болгондуктан психолог болуп калган. Үйлөнгөнгө чейин экөөбүз 2 жылдай кыз-жигит болуп жүргөнбүз, ошол убакта сынап, байкаштырып, мени 5 колундай билип, анан үйлөнгөн да".
.
-
"Турмушка чыгарда жолдошума “чыгармачылыкты таштабайм, улантышым керек. Буга көнсөң гана сага турмушка чыгууга макулмун” деп башында эле сүйлөшүп алганбыз. Көп учурда мырзалар айымдарын кызганып эл алдына чыгаргысы келбейт. Мен дагы ошондой болбосун дедим. Кыз киши атасына окшош мырзаны издейт экен. Жолдошум атама окшош. Ак көңүл, ичинде кири жок адам. Акыркы акчасын деле кармата салган берешен жигит. Ал мени биринчи көргөндө эле “жубайым болот” деп элестетиптир. Менде жолукканда эле андай сезим болгон эмес. Анын чын жүрөктөн кылган мамилесин, чыныгы эркектик сапатын бааладым. Жолдошум артымдагы тыл, балдарымдын мээримдүү атасы, менин сүйүктүү мырзам".
Учурда үй-бүлөлүү, жолдошу Азамат экөө 3 баланын бактылуу ата-энеси.
Чыгармачылыктын чыйыр жолунда ар дайым жаңычылдык жаратып, өзгөчө клиптерди, образдарды жаратып келет.
