Сеулдагы каргашалуу окуяга байланыштуу Садыр Жапаров Кореянын президентине көңүл айтты

Президент Садыр Жапаров Кореянын президенти Юн Сок Ёлго Сеул шаарындагы массалык тыгында адамдардын каза болгондугуна байланыштуу көңүл айтуу телеграммасын жөнөттү. Бул тууралуу президенттин маалымат кызматынан кабарлашты.

"Үстүбүздөгү жылдын 29-октябрында Итхэвон районунда орун алган массалык тыгындын натыйжасында көп сандаган адамдардын каза болгондугу тууралуу кабарды терең кайгыруу менен кабыл алдым. Кыргызстан элинин жана жеке өзүмдүн атымдан каза болгондордун үй-бүлөлөрүнө жана жакындарына көңүл айтып, жабыркагандардын тезирээк сакайып кетишин каалайм. Орду толгус жоготуунун азабын жана кайгысын тең бөлүшөм", - деп айтылат мамлекет башчысынын телеграммасында.

Эске сала кетсек, 30-октябрга караган түнү Түштүк Кореянын борбору Сеулда Хэллоуин майрамын белгилөө учурундагы тыгындан 150дөн ашык адам каза болуп, 100дөй киши жаракат алган.

Буга байланыштуу аталган өлкөдө улуттук аза күтүү жарыяланган.

Автор: Максуда Кудайбердиева