Москвада Путин менен Токаев жолугушту

Бүгүн, 28-ноябрда Москвада Орусия менен Казакстандын мамлекет башчылары Владимир Путин жана Касым-Жомарт Токаев жолугушту.

Бул Токаевдин 20-ноябрда Казакстандын президенти болуп кайра шайлангандан кийинки биринчи чет элдик сапары.

Жолугушууда Путин казак лидерин шайлоодогу жеңиши менен дагы бир жолу куттуктап, өлкөнүн саясий жана социалдык-экономикалык турмушунда реформаларды жүргүзүү пландарын ишке ашырууда ийгиликтерди каалады.

Токаев куттуктоолор үчүн ыраазычылык билдирип, Казакстан үчүн Орусия негизги стратегиялык өнөктөш катары кала берерин, аларды ар кыл тармактагы өз ара алака байланыштырып турарын кошумчалады.

Мамлекет башчылары 2021-2022-жылдардагы товар алмашуунун дурус болгон көлөмү тууралуу кеп кылышты.

Жолугушуунун жыйынтыгында Касым-Жомарт Токаев менен Владимир Путин эки өлкөнүн ортосундагы дипломатиялык мамилелердин түзүлгөндүгүнүн 30 жылдыгына байланыштуу декларацияга кол коюшту.

Автор: Бек Оморбеков