Акылбек Жапаров JICA президенти Акихико Танака менен жолугушту

Министрлер кабинетинин төрагасы Акылбек Жапаров Японияга болгон иш сапарынын алкагында Япон эл аралык кызматташтык агенттигинин (JICA) президенти Акихико Танака менен жолугушту. Бул тууралуу бүгүн, 30-ноябрда өкмөттүн маалымат кызматынан билдиришти.

Маалыматка ылайык, жолугушууда өз ара кызыкчылык туудурган маселелердин кеңири чөйрөсү талкууланды.

"Тараптар жол инфраструктурасын реабилитациялоо, медициналык мекемелерди модернизациялоого көмөктөшүү, адамды өнүктүрүү боюнча кыргыз-япон борборунун ишмердүүлүгүнүн жана JDS программасынын (кадрларды даярдоо боюнча стипендиялык программа) алкагында адамдык потенциалды өнүктүрүү жаатында кызматташуу сыяктуу багыттарга токтолушту", - деп айтылат маалыматта.

Белгилей кетсек, Япон эл аралык кызматташтык агенттиги (JICA) өнүгүп келе жаткан өлкөлөрдүн көз карандысыз жана туруктуу өнүгүүсүнө көмөк көрсөтүү максатында социалдык-экономикалык өнүгүүгө жана адам ресурстарын өнүктүрүүгө жардам көрсөтөт.

Автор: Бек Оморбеков
Фото: Министрлер кабинетинин маалымат кызматы