Президент кыргызстандыктарды мамлекеттик гимндин 30 жылдыгы менен куттуктады

Өлкө башчы Садыр Жапаров бүгүн, 18-декабрда кыргызстандыктарды өлкөнүн мамлекеттик гимнинин 30 жылдыгы менен куттуктады. Бул тууралуу президенттин маалымат кызматынан кабарлады.

Мамлекет башчысы өлкөбүз эгемендүүлүккө ээ болгондо мамлекетибиздин символикалык белгилерин кабыл алып, келечекке жол алганбызды эске салып, бүгүн ошол ыйык белгилерибиздин бири болгон мамлекеттик гимнибизге 30 жылдын жүзү болуп отурганын белгиледи.

"Бардыгыңыздарды жаңырса жүрөк толкуткан, көкүрөккө кол басып өлкөнүн эгемендигин, азаттыгын ураан кылган Кыргыз мамлекетинин гимнинин 30 жылдык мааракеси менен чын дилимден куттуктайм!

Ар бир улут өзүнө таандык мүнөзү, тили, маданияты менен өзгөчөлөнөт. Ал эми улуттун мамлекет катары калыптанышы, көз карандысыздыгы – бул элдин эң башкы бакыты, олжосу! Ошол бакытты, ошол жетишкендикти даңазалап, өлкө тагдырынын кечээгисин баяндап, бүгүнкүсүн ырастап, эртеңкисине илгери үмүт менен караткан, атуулдук сезимди ойготкон мурастуу музыкалык-поэтикалык салтанаттуу ырыбыз, ыйык символубуз – бул мамлекеттик гимнибиз!

Өлкөбүздө тынчтык өкүм сүрүп, асманыбыз ачык, келечегибиз жарык болсун! Түндүгүн күн чайыган кызыл туубуз көк серпип желбиреп, гербибиз мөөр болуп басылып, жүрөк туйлаткан гимнибиз түбөлүк жаңырсын!", - деп жазылат мамлекет башчысынын куттуктоосунда.

Автор: Бек Оморбеков