Батир, эки унаа... Салык кызматынын лотереясынын байге фонду көбөйтүлдү

Мамлекеттик салык кызматы "Чек талап кылып, байге утуп ал!" лотереясынын үчүнчү утушунун байге фондун көбөйттү. Мекемеден кабарлагандай, учурда байге фондунда 52 белек коюлду.

Маалыматка ылайык, 30-декабрда боло турган 3-утушта 12 даана iPhone 13, 11 Samsung смартфону, 5 кир жуугуч машина, 5 муздаткыч, 5 телевизор, 5 чаң соргуч, 6 микротолкундуу меш ойнотулат. Баш байге үчүн Бишкек шаарынан батир коюлду. Мындан тышкары эки электромобиль ойнотулат.

"Чек талап кылып, байге утуп ал!" лотереясынын үчүнчү утушу 2022-жылдын 30-декабрында КТРК, "Ала-Тоо 24" телеканалдарында жана Салык кызматынын Facebook жана YouTube баракчаларында түз эфирде көрсөтүлөт.

Бүгүнкү күндө лотереяга 170 миңден ашык адам катышып, алар жалпы суммасы 18 миллард 3 миллион сомго 17 миллион 900 миң лотереялык ID-билеттерди топтошкон.

Белгилеп өтсөк, лотереянын катышуучусу болуу үчүн "Салык Чек" мобилдик тиркемесин жүктөп алуу, каттоо жол-жобосунан өтүү жана кассалык чектердин QR-кодун сканерлөө зарыл.

Автор: Айжанар Рыспек кызы
Фото: Интернеттен алынды