"Манас" аэропорту 5 миллионунчу жүргүнчүнү тейледи. Ага 100 миң сом берилди

29-декабрда «Манас» эл аралык аэропорту 5-миллионунчу жүргүнчүнү тейледи. Бул тууралуу аэропорттун маалымат кызматы кабарлады.

Маалым болгондой, 5 миллионунчу жүргүнчү Иркутск шаарынан «Авиа Траффик Компани» авиакомпаниясынын каттамы менен келген Абай кызы Наркиза болду.

"Буга байланыштуу «Манас 2» аэробекеттик комплексинде салтанаттуу иш-чара өттү. 5-миллионунчу жүргүнчүнү мамлекеттик мүлктү башкаруу фондунун төрагасы Мирлан Бакиров, «Манас» эл аралык аэропортунун башкы директору Манасбек Самидинов, «Авиа Траффик Компани» авиакомпаниясынын өкүлдөрү тосуп алышты.

«Манас» эл аралык аэропортунун башкы директору Манасбек Самидинов 5-миллионунчу жүргүнчүгө «МЭА» ААКнын корпоративдик белектерин жана 100 миң сомдук сертификат тапшырды", - деп айтылат маалыматта.

Мындан тышкары Абай кызы Наркизага «Авиа Траффик Компани» авиакомпаниясы 2 акысыз билет тапшырган. «Манас Менеджмент Компаниясы» ЖАКсы юбилейлик жүргүнчүгө «Манас» аэропортунун VIP-залында акысыз тейленүү мүмкүнчүлүгүн белек катары тартуулады.

Автор: Айжанар Рыспек кызы
Фото: "Манас" эл аралык аэропорту