“Кумтөр”, "Кемпир-Абад" жана Баткен". Жапаров өткөн жылда өлкө үчүн эң маанилүү нерсени атады

Өткөн жылда өлкө үчүн эң маанилүү нерсе “Кумтөр”, Кемпир-Абад жана өксүгү айыга элек Баткен окуясы болду. Бул тууралуу министрлер кабинетинин төрагасы Акылбек Жапаров "Кабар" маалымат агенттигине берген маегинде билдирди.

Бул пикирди улай журналист: "Ооба, “Кумтөр”, Кемпир-Абад жана Баткен жаңжалына байланыштуу маселелер эң талаштуу, эң резонанстуу жана актуалдуу болду. Аларга байланышкан коомдогу талаш-тартыштын аягы дагы да басаңдай элек...", - деген.

"Демек, алардын өлкөбүздүн келечегине тийгизген таасирин бир түрдүү баалоого болбойт, ошол үчүн басаңдабай жатат. “Кумтөрдү” элге кайтарып берүү экономикалык эмес, руханий иш экенин айтуудан тажабайм. Бул Кыргызстандын жаңы тарыхын эки башка этапка бөлгөн сызык. Кумтөрдүн кайтарылышы – бул өтө символикалык акт. Бул элдин мүлкүн басып алган тышкы душманды гана эмес, ички душманды да – өз коркуубузду, өз күчүбүзгө ишенбөөчүлүктү жеңүү. Анткени көбү мындай татаал, жогорку технологиялуу өндүрүштү башкара албайсыңар деп, түз мааниде бизге өзүн кем сезүү комплексин таңуулашты. Эң негизгиси - коррупцияга катуу сокку болду. Анткени балык башынан сасыйт. Себеби Кумтөрдөн ижара акысын алган өлкө жетекчилиги коррупция менен күрөшө алмак эмес", - деген пикирин билдирген Жапаров.

- Ошондо биздин өлкөдө коррупция жеңилдиби?

- Коррупцияны принципиалдуу түрдө жеңүү мүмкүн эмес. Себеби ал бийлик жана адамдын табиятына кеңири сиңип калган көйгөй. Аны толук жок кыла албасак да, деңгээлин мүмкүн болушунча азайтса болот. Ал үчүн бийлик башында турган адамдар таза болушу керек. Азыр биз мамлекетибизди акырындан ичинен жеп жаткан негизги залалдуу шишикти алып койдук, эми калган метастаздары менен күрөшүү жеңил.

- Коррупция демекчи, сиздин оппоненттериңиз сизди көп учурда коррупция менен айыпташат.

- Уинстон Черчиллдин жакшы сөзү бар: "Сен ар бир үргөн итке таш ыргытсаң, эч качан көздөгөн жериңе жетпейсиң". Анын сыӊары, мага жасалган чабуулдарды карап отурганга убактым жок.

- Үчүнчүсү - Баткен?

- Баткен биздин кайгыбыз. Бир жагынан кайгы болсо, экинчи жагынан сыймык. Күчү толуп турганда курман болгон биздин жоокерлерибиз, жаштарыбыз, карапайым элибиз, балдарыбыз үчүн азап чексек, алардын эрдиги, туруктуулугу жана сабырдуулугу менен сыймыктанабыз. Бир муштум менен өлкө үчүн оор мезгилде тикесинен тик турган коомубуздун сыймыгы.

Баткен - ар кандай аскердик кагылышуулар сыяктуу эле эл, мамлекет үчүн чоң сыноо болду жана биз бул сыноодон татыктуу өттүк. Жабыркагандарга жардам берүү үчүн мамлекет керектүү каражаттарды табууга жетишти, башкача айтканда, кандайдыр бир коопсуздукту түзө алдык. Мен муну өкмөттүн ишине баа берүүдөгү маанилүү жагдай деп эсептейм.