Үшүк алганда эмне кылбоо керек? ӨКМ сууктан сактануу эрежелери менен бөлүштү

Эртең, 11-январдан тарта өлкөдө аномалдык суук болушу күтүлүүдө. Кыргызгидрометтин маалыматына ылайык, өлкөдө аба ырайы кескин өзгөрүп, кар жаап, жолдордо муз тоңот. Кээ бир аймактарда абанын температурасы -38 градуска чейин төмөндөшү күтүлүүдө. Буга байланыштуу Өзгөчө кырдаалдар министрлиги сууктан сактануу үчүн эрежелер менен бөлүштү.

Сууктан сактануу эрежелери:

Эң алгач кан айланууну камсыздоочу кан тамырларды коргоо үчүн башты жана моюнду жылуу кармоо зарыл. Мындан сырткары суукка чыгардан мурун жакшылап тоюп алуу керек. Анткени ачкалык адамдын организминин суукка каршы күрөшүүсүнө тоскоолдук жаратат. Алкоголдук ичимдиктер адамдын суукту сезүү мүмкүнчүлүгүн төмөндөтөт. Ал эми тамеки тартуу кан тамырлардын ичкерүүсүнө алып келип, кан айланууну басаңдатат. Ошондуктан алкоголдук ичимдиктерден жана тамеки тартуудан алыс болуу сунушталат.

Абанын температурасы -15 градустан төмөндөгөн учурда үшүк алдыруудан сактануу үчүн денеге кам көрүү керек. Дарыканалардан, дүкөндөрдөн бальзам, мазь, крем жана башка коргоочу косметикаларды сатып алса болот. Ошондой эле жылуу кийинүү, нымга туруктуу кийимдерди колдонуу сыяктуу коргонуунун элементардык эрежелерин сактоо абзел.

Үшүк алууда биринчи жардам:

Дененин үшүк алуусу төмөндөгү белгилер аркылуу байкалат: адамдын денесинин үшүк алган бөлүктөрүнүн сезгичтиги жоголот жана ачышуу, сайгылашуу сезимдери пайда болот.

Үшүктүн 3 даражасы бар:

• үшүк алган тери кубарып кетет;
• денеде ыйлаакчалар пайда болот;
• дененин үшүк алган бөлүгүнүн көгөрүүсү.

Экинчи жана үчүнчү даражадагы белгилер пайда болгон учурда үй шартында дарыланбастан, токтоосуз дарыгерге кайрылыш керек. Ал эми биринчи даражадагы үшүк белгилери байкалса жылуу бөлмөгө кирип, үшүк алган жерлерге калың марли же пахта коюп, клеенка менен таңуу сунушталат. Үшүк алган колду же бутту ванна кабыл алуу менен да жылытса болот. Суунун температурасы +20 градустан жогорулатуу аркылуу +40 градуска чейин жеткирүү зарыл. Мындай процесс 40 мүнөткө созулуп, үшүк алган дене бөлүктөрүн жай укалоо керек. Андан кийин чай же башка жылуу суусундук ичсе болот. Мындан сырткары организмдин жалпы абалына байкоо жүргүзүү зарыл. Анткени үшүк алуунун экинчи жана үчүнчү даражасынын белгилеринин пайда болуу ыктымалдуулугу бар.

Үшүк алганда эмне кылбоо керек?

Адамдардын көпчүлүгү теринин үшүк алган жерлерин сүртүү жардам берет деп ойлошот. Бирок бул туура эмес. Анткени сууктан улам кан тамырлар морт болуп, сүртүү учурунда аларга зыян келүүсү мүмкүн. Натыйжада пайда болгон чакан көк-алалар аркылуу организмге инфекция кириши мүмкүн. Ошондой эле үшүк алган бутту тез жылытууга болбойт. Бул жабыркаган ткандардын калыбына келүү процессин начарлатат.