"Мен 22 жаштагы эки кызга тең келем". Дүйнөгө белгилүү ырчы Шакира 46 жашка толду

Бүгүн, 2-февралда дүйнөгө белгилүү, атактуу ырчы, бийчи Шакира 46 жашын белгилөөдө. Ушул эле күнү, бирок он жылдан кийин анын мурдагы жолдошу, футболчу Жерар Пике төрөлгөн. Бирок дүйнө эли Шакираны атактуу спортчу менен болгон мамилеси үчүн эмес, жалындуу ырлары, ачык мүнөзү жана дүйнө жүзүндөгү балдардын билим алуусуна кошкон салымы үчүн сүйүшөт. Төмөндө Шакиранын дүйнөгө кантип таанылганын айтып беребиз.

Шакиранын карьерасынын башталышы

1977-жылы Шакира Риполль Колумбиянын Барранкиль шаарында төрөлгөн. Атасы Уильям Меберактын улуту - араб, кесиби - жазуучу. Ал эми апасы Нидия Риполлинин жердиги колумбиялык. Шакира апасынын жалгыз кызы, ал эми атасынын биринчи никесинен 7 баласы бар. Шакиранын таланты бала кезинен эле байкала баштаган. Бир жарым жашында алфавитти толук билип, үч жашында китеп окуганды үйрөнгөн. Ал эми төрт жашында мектепке барганга толук даяр болгону менен, жашынын жетпегенине байланыштуу кабыл алынган эмес. 1-классынан Шакиранын бийге жөндөмдүүлүгү өзгөчө байкала баштаган. Бардык жергиликтүү бий сынактарынан биринчиликти бербей келген Шакира 8 жашка толгондо анын дагы бир таланты ачылып, ырдап да чыга баштаган.

Таланты ташкындаган секелек кыз 13 жашында "Sony Music" компаниясы менен өзүнүн альбомун чыгаруу жөнүндө келишим түзгөн. Ошол эле жылы анын “Магия” аттуу биринчи альбому жарык көргөн. Аябагандай ийгиликтүү болгон альбому жаш кызды бүткүл Колумбияга тааныткан. 2000-жылы Шакира Америкага көчүп келген. 10 миллиондогон дисктери сатылып, миллиондогон элдин оозуна алынганы менен, Шакираны чыныгы жылдыз кылып тааныткан альбому 2001-жылы жарык көргөн. Ал “Кир жуучу жайдын тейлөөсү” ("Laundry Service") аттуу альбому эле. Бул альбомдун ичиндеги тогуз ыры англис, төрт ыры испан тилинде жазылган. Альбомдогу “Качандыр бир” ("Whenever, whenever") аттуу ыры өзгөчө мыкты аткарылып, ырчыны дүйнөгө тааныткан. Ырга жарашыктуу клип дагы тартылган. Бул клипте Шакира өзүнүн бийлөө талантын жакшы көрсөтө алган. Бул ыры дүйнө жүзүндөгү 1-орундагы хит болуп аталган.

Шакиранын жеке жашоосу

Шакира 2010-жылдан баштап испаниялык футболчу Жерар Пике менен мамиле кура баштаган. 2013-жылы 22-январда уулдуу болуп атын Милан Пике Мебарак койгон. Экинчи уулун 2015-жылы 29-январда төрөп, Саша деген ат койгон.

Эске салсак, Шакира менен Пике он эки жылдык мамиледен кийин былтыр жайында эки айрым жолго түшүшкөн. Айрым маалыматтар боюнча буга себеп Пикенин башка кыз менен мамиле курганы болгон. Көп өтпөй Шакира "Music Sessions 53" деп аталган жаңы ыр чыгарды. Анда: “Мен 22 жаштагы эки кызга тең келем, Сен Ferrari`ни Twingo`го алмаштырдың, Rolex`ти Casio`го алмаштырдың, спорт залга көп барасың, андыктан мээңди да машыктыр" деген саптары бар. Мындан улам ырчынын күйөрмандары бул ыр Пикеге арналганын дароо түшүнүштү.