Түркияда үчүнчү ирет катуу жер силкинди

Түркияда күчү Бишкек убактысы боюнча саат 16:51де күчү 5,8 баллга жеткен жаңы жер титирөө катталды. Бул тууралуу Европа-Жер Ортолук деңиз сейсмологиялык борборуна таянуу менен РИА Новости басылмасы жазды.

Маалыматка ылайык, жер титирөөнүн очогу Малатья шаарынан 17 чакырым алыстыкта болгон. Очок сегиз чакырым тереңдикте жаткан. Бул жер титирөөдөн кыйроолор жана каза болгондор тууралуу маалымат жок.

Бүгүн, 6-февралда саат 04:17де Түркиянын түштүк-чыгышындагы жети аймагында күчү 7,4 баллга жеткен катуу жер титирөө болгон. Жер титирөөдөн акыркы маалыматтар боюнча 912 адам каза болуп, 5 миңден ашуун адам жаракат алган.

Андан кийин Бишкек убактысы боюнча саат 16:24тө Түркиянын борбордук бөлүгүндө күчү 7,7 баллга жеткен жаңы жер титирөө катталган.

Автор: Азат Бейшенбеков