Электр энергиясынын тарифин 1 сомго жогорулатуу, лимитти эки эсе көтөрүү пландалууда

Өлкөдө электр энергиясына болгон тарифти 1 сомго чейин кымбаттатып, лимитин 700 киловаттан 1 500 киловатт-саатка көбөйтүү сунушталды. Өкмөттүн тийиштүү токтому коомдук талкууга коюлду.

Азыркы тапта айына 700 киловатт-саатка чейин керектөөдө калк 77 тыйындан, андан ашканда 2 сом 16 тыйындан төлөйт. Ал эми ишкана, уюмдар үчүн өзүнчө тариф каралган.

"Электр энергиясынын баасын реалдуулукка жеткирүү үчүн ошондой эле электр тогу менен үзгүлтүксүз камсыздоо максатында 1-майдан тарта тарифти 1 сом кылуу (салыктарды эсепке албаганда) сунушталууда. Тарифтин жогорулашына байланыштуу арзан электр энергиясынын лимитин 700дөн 1 500 киловатт-саатка жогорулатуу керек болот. Ал эми мындан ашканда 2,16 сом бойдон калат", - деп жазылат анда.

Ошондой эле "Үй-бүлөгө көмөк" жөлөк пулун алган аз камсыз үй-бүлөлөргө тарифти мурдагыдай эле калтыруу (50 тыйын, лимит 1 500 киловатт-саат) пландалып жатат.

Буга чейин өлкө башчы Садыр Жапаров калк үчүн электр энергиясына тарифтер 1-майдан тарта көтөрүлөрүн билдирген.

Автор: Бек Оморбеков
Фото: Интернеттен алынды