Жалал-Абад шаарында 4 күн бою жаратылыш газы өчүрүлөт

Жалал-Абад шаарында 5-апрелден 9-апрелге чейин жаратылыш газы өчүрүлөт. Бул тууралуу «Газпром Кыргызстан» компаниясынан билдиришти.

Буга "Майлуу-Суу-4-Ош" магистралдык газ өткөргүчтүн ишенимдүү эмес бөлүгүндөгү түтүгүн пландалган алмаштыруу иштери себеп болгону айтылды.

"Мындай иштер Жалал-Абад шаарынын колдонуучуларын жаратылыш газы менен үзгүлтүксүз камсыз кылуу үчүн жана 1965-жылы курулган магистралдык газ өткөргүчтүн иштөө ресурсун калыбына келтирүү максатында өткөрүлүүдө" деп билдиришти мекемеден.

Мекеме түзүлгөн ыңгайсыздыктар үчүн кечирим сурайт жана түшүнүү менен кабыл алууну өтүнөт.

Автор: Алина Айдарбекова