Медиа кызматкерлери үчүн Осмон империясынын борбор шаарларына саякат уюштурулду

25-29-апрель аралыгында Түркиянын Маданият жана туризм министрлигине караштуу Туризмди өнүктүрүү агенттиги жана Түркиянын Кыргызстандагы элчилигинин маданият кеңешчилиги уюштурган “Осмон империясынын борбор шаарларына саякат” иш-чарасы өттү.

Бул программанын алкагында Кыргызстандан, Казакстандан, Өзбекстандан, Босния-Герцеговина жана Сербия өлкөлөрүнөн келген медиа кызматкерлери Түркиянын Стамбул, Эдирне, Бурса жана Билежик шаарларынын маданий жайларын, тарыхый имараттарын жана башка маанилүү жайларын кыдырышты.

Саякаттын жүрүшүндө катышуучулар Осмон империясынын түзүлүшү, империянын курулушуна салым кошкон адамдар, тарыхый имараттардын курулуш таржымалы тууралуу кеңири маалымат алышты.

Осмон империясынын эң биринчи борбор шаары Билежиктин Сөгүт аймагы болгон. Экинчи борбор шаары Бурса, үчүнчүсү Эдирне, төртүнчүсү азыркы Стамбул шаары. Осмон империясы 1299-жылы осмон түрктөрү тарабынан Осмон Газинин жетекчилигинде түзүлгөн мамлекет.

Ал Чыгыш Европа, Түштүк Батыш Азия жана Түндүк Африкага чейинки жерлерди ээлигине алган, XVI кылымга келгенде дүйнөнүн эң күчтүү империясы боло алган түрк-ислам мамлекети. Осмон империясынын пайда болушу Византиянын, тагыраак айтканда, Чыгыш Рим империясынын кулашы менен пайда болгон.

Византиянын борбору Константинополь, азыркы Стамбул шаары болгон. Осмон империясы Оттаман империясы деп да айтылган. Империя 1923-жылга чейин, тагыраак айтканда, Мустафа Кемаль Ата түрк Түрк Республикасын түзүп, анын биринчи президенти болгонго чейин өкүм сүргөн.

Автор: Гулийпа Маметосмон кызы
Фото: Гулийпа Маметосмон кызы