"Апа, мени алып кетиңизчи". Өзбекстанда аялынан өч алуу үчүн балдарын сабаган жаран кармалды

Коңшу Өзбекстанда аялынан өч алуу үчүн балдарын сабап, кыйноого алган жаран кармалды. Бул тууралуу Өзбекстандын жергиликтүү басылмалары жазышты.

Маалыматка ылайык, ал таарыныша кеткен аялынан өч алуу үчүн уктап жаткан наристени башка тээп, андан кийин ток зымы менен муунткан.

Ал кыйнап жаткан кызын видеого тарткан маалда кызы "Апа, мени алып кетиңизчи" деп ыйлаган.

Өзбекстандын Башкы прокуратурасынын маалыматы боюнча, 2022-жылдын сентябрь айында Ташкент облусунун Янгиюль районунда 30 жаштагы А.Н. үй-бүлөлүк пикир келишпестиктен улам эки жашар наристени такай кыйнап, сабап келген. Анын баарын аялынан өч алуу максатында телефонго тартып алган.

13-майда Янгиюль РИИБнин тергөө бөлүмү жашы жете элек кызды кыйноого алган жаранга кылмыш ишин козгоду. Бул кылмышы үчүн ал 360 сааттан 480 саатка чейинки мөөнөткө милдеттүү коомдук жумуштарга же 2 жылдан 5 жылга чейинки мөөнөткө эркиндигин чектөөгө, же 5 жылга чейинки мөөнөткө эркиндигинен ажыратуу жазасын алат.

Учурда ал кармалып, иликтөө иштери жүрүп жатат. Иш Өзбекстандын Башкы прокуратурасынын көзөмөлүнө алынды.

Автор: Азат Бейшенбеков