Өлкө башчы Садыр Жапаров 9-февралда Бишкекте кол коюлган Министрлер кабинети менен Япония Өкмөтүнүн ортосундагы “Бишкек шаарында жана Чүй облусунда медициналык жабдууларды жакшыртуу” долбоору боюнча эл аралык келишимди түзгөн Алмашуу ноталарын жана Министрлер Кабинети менен Япония эл аралык кызматташтык агенттигинин (JICA) ортосундагы “Бишкек шаарында жана Чүй облусунда медициналык жабдууларды жакшыртуу” долбоору боюнча Гранттык макулдашууну ратификациялоо жөнүндө мыйзамга кол койду.
Президенттин басма сөз кызматынан билдиргендей, аталган долбоор Бишкек шаарынын жана Чүй облусунун саламаттык сактоо уюмдарын жугуштуу эмес ооруларды диагностикалоо жана дарылоо үчүн медициналык жабдуулар менен камсыз кылуу аркылуу диагностикалык жана дарылоо потенциалын чыңдоо каралган, бул медициналык кызмат көрсөтүүгө негиз болуп, ошону менен медициналык кызмат көрсөтүүнүн сапатын жогорулатууга салым кошот.
"Гранттык макулдашуунун шарттарына ылайык, Япония Өкмөтү Кыргызстандын Министрлер кабинетине Алмашуу ноталарынын жана Гранттык макулдашуунун алкагында Япониянын мыйзамдарына ылайык мыйзамдуу укук өлкө-булактардан товарларды жана кызмат көрсөтүүлөрдү сатып алуу үчүн 999 миллион япон йени (¥ 999,000,000) өлчөмүндө грант берет", - деп айтылат маалыматта.
Белгилей кетсек, мыйзам Жогорку Кеңеш тарабынан 13-апрелде кабыл алынган.