Токторбаевдин талкууга түшкөн малдан салык алуу сунушуна президент кандай пикирде? Расмий жооп

Өлкө башчы Садыр Жапаров мал-жандыкка салык салуу демилгесин колдобойт. Бул тууралуу бүгүн, 29-майда президенттин администрациясынын маалыматтык саясат кызматынын башчысы Дайырбек Орунбеков билдирди.

Ал Жогорку Кеңештин депутаттары тарабынан демилгеленген мал жандыктарга салыктын түрүн киргизүү сунушу коомдо терс пикирлерди жаратып жатканын белгиледи.

"Мындай демилгени - мамлекеттик бийликтин позициясы катары түшүнүп алгандар дагы жок эмес. Президент Садыр Жапаровдун жарлыгы менен былтыр апрелде фермерлер жана дыйкандарга жеңилдиктер берилген. Анда айыл-чарба багытындагы пайдаланган жерлер 3 жылга салыктан бошотулган. Ал мөөнөт аяктагандан кийин жер салыгынан бошотуу тууралуу маселе кайра каралат. Демек, президент фермерлерге жана дыйкандарга жеңилдик шарттар түзүлүшү керек деп эсептейт. Ошондой эле депутаттардын мал-жандыктарга салыктын түрүн киргизүү демилгесин колдобой турганын маалымдайбыз", - деп жазды Орунбеков.

Белгилей кетсек, Жогорку Кеңештеги "Ата-Журт Кыргызстан" фракциясынын депутаты Жеңишбек Токторбаев мал-жандыктан салык алууга байланыштуу мыйзам долбоорун 22-майда коомдук талкууга чыгарган.

Ага ылайык, жеке менчигинде 40 баш кой-эчкиси, 3 баш уй, 2 баш жылкысы барлар салык төлөөчү болуп саналат жана жылына бир жолу кой-эчкиге 100 сом, ал эми бодо мал менен жылкыга 250 сом салык төлөшү керек болот.

Эл өкүлүнүн мындай сунушу коомчулукта кызуу талкууга жем таштап, түрдүү пикирлер айтылган.

Автор: Бек Оморбеков