"Батуми" чыры: Депутат Орунтаевден 3 миллион сомду кайдан аларын сурады

Бүгүн, 30-майда Бишкек шаардык кеңештин депутаттары жыйында “Батуми” кафеси боюнча маалымат угушту.

Жыйында шаардык кеңештин депутаты Жаныбек Асанбеков Орунтаевден "Батуминин" кожоюндарына компенсация төлөп берүү үчүн 3 миллион сомду кайдан ала турганын сурап, ал акыркы 10 жыл тергөөчү болуп иштегенин эске салды.

"10 жыл тергөөчү болуп иштептирсиз, 3 миллион сомду төлөп берем дептирсиз. Ал акчаны каяктан аласыз?", - деди Асанбеков.

Өз кезегинде Орунтаев тергөө органдарынын чечимине эч ким комментарий берүүгө укугу жок экенин айтып, жооп берүүдөн баш тартты.

Эске салсак, 24-майда борбор калаанын "Жал" кичи районунда "Батуми" кафеси буздурулган. Тамак-аш түйүнү Тыналиев көчөсүндө жайгашкан, анын жалпы аянты 1,3 миң чарчы метрди түзөт.

УКМКнын төрагасы Камчыбек Ташиев президенттин тапшырмасынын негизинде окуя болгон жерге барып, кырдаалды иликтөөнү атайын кызматтарга тапшырган.

26-майда УКМК Нурдан Орунтаевге “Батуми” кафесин бузууда кызмат абалын кыянаттык менен пайдалануу фактысы боюнча кылмыш иши козголуп, чыгымдарды төлөп берүүгө милдеттендирилгендигин билдирген.

Автор: Азат Бейшенбеков