Жүрөк ооруларынан жабыркагандар аптаптуу ысыктан кантип сактанышы керек? Дарыгердин кеңеши

Эртең, 9-июнь өлкөнүн айрым аймактарында аба ырайынын температурасы +40 градуска чейин ысык болушу күтүлөт. Буга байланыштуу аптаптуу ысыкта жүрөк-кан тамыр оорулары менен ооруган адамдар кантип сактанышы керек деген суроо менен жогорку категориядагы врач-кардиолог, саламаттык сактоонун отличниги Памирбек Абдыбаповго кайрылдык.

Дарыгердин айтымында, аба ырайынын температурасынын кескин көтөрүлүшү өзгөчө жүрөк-кан тамыр оорусу барларга өтө коркунучтуу.

"Кыргызстан тоолуу өлкө болгондуктан жүрөк-кан тамыр оорулары менен жабыркагандар арбын. Анткени жерден канчалык бийиктеген сайын кычкылтек азайып, жүрөккө күч келет. Аталган ооруга: кан басымынын көтөрүлүшү, жүрөктүн ишемиялык оорусу, жүрөктүн тубаса кемтиги кирет. Оору кан айлануу менен байланыштуу болгондуктан, күндүн катуу ысып кетиши аталган дарт менен жабыркагандарга терс таасирин тийгизет", - деди Абдыбапов.

Дарыгер жүрөк-кан тамыры менен ооруган жарандарга жай мезгилинде төмөнкү кеңештерди сунуштайт:

• жүрөк оорусу менен ооругандар зарылчылык болбосо, күндүн аптаптуу ысыгында сыртка чыкпай эле койгону оң;
• алар үчүн сыртка чыгуу убактысы эртең мененки саат 06:00дөн 09:00гө чейин;
• негизинен хирургдар бул ооруга чалдыккандарга сууну аз көлөмдө ичүүнү сунушташат. Бирок күндүн ысыгына байлануштуу сууну бир аз көбүрөөк ичсе болот;
• сууну бөлмө температурасында ичүү керек;
• майлуу тамактардан, таттуулардан, газдалган суусундуктардан алыс болуусу зарыл;
• жашылча жер-жемишетерди көбүрөөк жеш керек (бадыраң, помидор, укроп ж.б.);
• бассейнге түшүүгө болот;
• жүрөк-кан тамыры жогору болгон бейтаптардын кан басымы төмөндөп кеткен учурда дарыгер жазып берген дарыларды ичпей койбош керек. Көлөмүн бир аз азайтып ичсе болот;
• жүрөктүн жетишсиздиги боюнча ооруган бейтаптар суу көп ичпегенге аракет кылыш керек; Көп суу ичүү оорунун өрчүп кетишине алып келет;
• негизинен эле жүрөк-кан тамырлары менен ооруган адамдарга спирт ичимдиктерин ичүүгө 100 пайыз тыюу салынат;
• жүрөк-кан тамыр ооруларынын пайда болуусунун себептери: чылым чегүү, майлуу тамактар менен тамактануу жана кыймыл аракеттин аздыгы.

"Кээ бир кишилер өзүнө күч-кубат алыш үчүн түрдүү зыяндуу адаттарга (энергетикалык ичимдиктерди ичүү, тамеки тартуу) кабылат. Тамеки тартуу - жүрөк-кан тамыр системасынын ооруларын пайда кылууда негизги факторлордун бири. Жүрөк-кан тамыр системасынын ооруларын алдын алууда жашка жана ден соолуктун абалына ылайык дайыма кыймыл аракетте болуу өтө маанилүү. Дайыма кыймылда болуу, машыгуу бардык ооруларга "дары" болбосо да, көп оорулардан сактайт. Ашкере өз алдынча машыгуу, көзөмөлсүз кыймыл-аракет ден соолукка зыян келтирип, жүрөк кан тамыр оорусун күчөтөт", - деди дарыгер.

Күндүн аптаптуу ысыгында көчөдө, коомдук унааларда кан басымы көтөрүлүп же түшүп, эс-учун жоготуп кулаган адамдарга эң алгач эле муздак суу берип же бетине, көкүрөгүнө суу чачыш керек. Ошондой эле эс-учун жоготкон адамды ыңгайлуу жерге отургузуу же жаткыруу зарыл.