Бишкекте троллейбус жана үч унаа катышкан жол кырсыгынын чоо-жайы

Бишкекте троллейбус жана үч автоунаа катышкан жол кырсыгы боюнча "Бишкек троллейбус башкармалыгы" муниципалдык ишканасы маалымат берди.

Ага ылайык, окуя 8-июлда болжол менен саат 20:40 чамасында орун алган. Калаадагы №7 каттамдын айдоочусу жол кырсыгына кабылган.

"Троллейбус айдоочусу Гагарин көчөсү менен батыш тарапты көздөй бара жаткан учурда Термечиков көчөсүнөн түштүк тарапты көздөй, Тойота-Камри үлгүсүндөгү жеңил автоунаа катуу ылдамдыкта чыгып келип троллейбусту алдыңкы дөңгөлөккө сүзгөн. Дөңгөлөк жарылып анын кесепетинен троллейбус жолдун карама-каршы тилкесине чыгып, Мазда үлгүсүндөгү автоунаа менен сүзүшүп токтогон. Мазда үлгүсүндөгү унааны Хундай унаасы сүзгөн", - деп айтылат билдирүүдө.

Жол кырсыгынан эки жүргүнчү жаракат алганы кошумчаланды.

Буга чейин борбор калаада троллейбус жана үч автоунаа катышкан кырсыктын видеосу тараган.

Автор: Бек Оморбеков
Фото: Интернеттен алынды