"Шайлоонун жыйынтыгы бийик кадыр-баркыңыздын айкын далили". Жапаров Мирзийоевди куттуктады

Президент Садыр Жапаров Өзбекстандын мамлекет башчысы Шавкат Мирзийоевди президенттик шайлоодогу жеңишине байланыштуу куттуктоо телеграммасын жолдоду. Бул тууралуу президенттин басма сөз кызматынан билдирди.

Садыр Жапаров куттуктоосунда Мирзийоевдин эки өлкөнүн ортосундагы мамилелердин чыңдалышына олуттуу салым кошууну улантып жатканын айтып, Кыргызстан менен биргеликте көп пландуу кызматташтыкты мындан ары да арттыра турганын билдирген.

"Урматтуу Шавкат Миромонович, сиздин президенттик шайлоодогу ишенимдүү жеңишиңиз менен чын дилимден куттуктайм. Президенттик шайлоонун жыйынтыгы сиздин Өзбекстан элиндеги бийик кадыр-баркыңыздын, республиканын туруктуу социалдык-экономикалык өсүшүн камсыз кылууга багытталган прагматикалык жана көрөгөч саясатыңызга болгон элдин ишениминин жана колдоосунун айкын далили.

Сиздин жетекчилигиңиз менен жүргүзүлүп жаткан реформалар, ошондой эле өлкөнүн мындан аркы өнүгүүсү боюнча мыкты идеяларды жана принциптерди ишке ашырууну көздөгөн кадамдар эл аралык аренада Өзбекстандын аброюн бекемдөөгө өбөлгө түзөт деп терең ишенем.

Баарын камтуучу стратегиялык өнөктөштүктү өнүктүрүү, өз ара урматтоо жана колдоо принциптеринин негизинде Өзбекстан менен ишенимдүү жана ынак коңшулук мамилелерди чыңдоо Кыргызстандын тышкы саясатынын башкы артыкчылыктарынын бири болуп саналат.

Кыргыз-өзбек мамилелеринде эки тараптуу кызматташтыктын дээрлик бардык багыттарында болуп көрбөгөндөй жакшы өзгөрүүлөр орун алып, маанилүү биргелешкен инвестициялык долбоорлорду ишке ашыруу боюнча конкреттүү макулдашуулар жетишилди.

Сиз эки өлкөнүн ортосундагы мамилелердин чыңдалышына олуттуу салым кошууну улантып жатасыз, ушууга байланыштуу биз биргелешкен аракеттер менен көп пландуу кызматташтыкты мындан ары да арттырабыз жана алдыга коюлган милдеттерди иш жүзүндө жүзөгө ашырууга жана боордош эки элдин бакубатчылыгы үчүн бардык макулдашууларыбызды илгерилетүүгө болгон күч-аракетибизди жумшайбыз деген бекем ишенимимди билдирем",- деп айтылат мамлекет башчысынын телеграммасында.

Ошондой эле өлкө башчы Шавкат Мирзийоевге бекем ден соолук жана алдыга койгон бардык максаттарын ишке ашырууда ийгиликтерди, ал эми боордош Өзбекстан элине тынчтык жана өнүгүү каалады.

Автор: Ширин Марат кызы