Каттамдар чектелет. Төө-Ашуудагы тоннелдин унаа жолуна асфальт төшөө иши башталды

Бүгүн, 26-июлда Төө-Ашуудагы Кусаин Көлбаев атындагы тоннелдин унаа жолуна асфальт-бетон төшөө иштери башталды. Бул тууралуу Транспорт жана коммуникациялар министрлигинен билдиришти.

Маалыматка крааганда, тоннелдин жолуна асфальт төшөө иштери 6-августка чейин уланат. Анда 2510 метр жол толугу менен асфальтталынат. Буга байланыштуу бүгүндөн тарта бардык унаалар үчүн каттам чектелет.

Сосновка өткөрүү пункту тарабынан:

- Оор жүк ташуучу унаалар үчүн: түнкү саат 03:00дон баштап 16:00го чейин,

- Жеңил унаалар үчүн: эртең мененки саат 06:00дон баштап 16:00го чейин жабылат.

Ал эми борбор калааны көздөй - Бишкек-Ош унаа жолунун 144-чакырымынан (Суусамыр өрөөнү):

- Оор жүк ташуучу унаалар үчүн: эртең мененки саат 05:00дон баштап 16:00го чейин,

- Жеңил унаалар үчүн: эртең мененки саат 06:00дон баштап 16:00го чейин жабык болот.

Министрликтин маалыматы боюнча, тоннель акыркы жолу 2000-жылдары оңдоп-түзөөдөн өткөн. Бүгүнкү күнгө чейин тоннелдин электр чубалгылары толук алмаштырылып, прожекторлору орнотулган. Ошондой эле актоо процесси жүрүп, тоннелдин бетон плиталары алмаштырылган. Азыркы тапта эски асфальтты сыйрып тазалоо иштери жүрүп жатат.

Автор: Ширин Марат кызы
Фото: интернеттен алынды