Ысык-Көлдө мыйзамсыз балык уулаган тургун кармалды

Ысык-Көлдө мыйзамсыз балык уулап жүргөн жергиликтүү тургун кармалды. Бул тууралуу бүгүн, 7-августта Ысык-Көл ОИИБинен билдиришти.

Маалыматка ылайык, Ысык-Көл облусунда көлдүн жээгинен мыйзамсыз балык уулап жүргөн 61 жаштагы Чолпон-Ата шаарынын тургуну кармалды. Андан далил катары 51 даана "Чабак" балыгы жана үйлөмө резина кайыгы алынганы айтылды.

Аталган факты Ысык-Көл РИИБинде каттоого алынып, чогултулган материалдар аймактык милициянын тергөө кызматына өткөрүлүп берилгени кошумчаланды.

Эске салсак, президент Садыр Жапаров буга чейин Ысык-Көлдө жана Соң-Көлдө жашаган балыктардын бардык түрлөрүн өндүрмөлүк кармоого, ташууга, сатууга, сактоого, сатып алууга жана ташып чыгууга үч жылга убактылуу тыюу салуу жөнүндө мыйзамга кол койгон.

Автор: Жанбулат Жумабеков
Фото: Интернеттен алынды