Жалал-Абадда келинди сабап, тоноп кеткен шектүү изделүүдө

Жалал-Абадда келинди сабаган шектүү изделип жатат. Бул тууралуу бүгүн, 10-августта облустук милициянын басма сөз кызматынан билдирди.

Маалыматка ылайык, 29-июлда саат 23:30 чамасында 24 жаштагы Ж.К. аттуу аял милицияга арыз менен кайрылган. Анда арыз ээси А. аттуу таанышы аны мас абалында уруп, Redmi 9 А үлгүсүндөгү уюлдук телефонун жана электрондук картасындагы 52 миң 900 сом акча каражатын тартып алгандыгын айткан.

"Ж.К. денесинен жараат алып Жалал-Абад облустук бириккен клиникалык ооруканасынын “хирургия” бөлүмүнө жаткырылган.

Бул факты боюнча Жалал-Абад шаардык ички иштер бөлүмүнүн маалыматтарды электрондук каттоо журналына катталып, Кылмыш жаза кодексинин 206-беренесинин 3-бөлүгүнүн 3-пункту боюнча иш козголгон", - деп жазылат маалыматта.

Териштирүү иштердин жүрүшүндө шектүүнүн аты-жөнү такталган. Ал Ош облусуна караштуу Кара-Суу районунун 31 жаштагы А.Х. аттуу тургуну болуп чыккан. Учурда анын жашаган, жүргөн жерин аныктоо үчүн тийиштүү кызматтарга тергөө тапшырмалары берилгени маалымдалды.

Автор: Айпери Бакталбек кызы
Фото: Жалал-Абад ОИИБ