Сокулукта 15 жашар өспүрүм эжесин өлтүрүүгө шектелип кармалды

Сокулук районунда бир тууган эжесинин өмүрүн кыюуга шектелген жаран кармалды. Бул тууралуу бүгүн, 28-августта Чүй облустук милициясынан билдирди.

Маалыматка ылайык, 23-август күнү Сокулук районунун Кашка-Баш айылында 2000-жылы туулган Д.М. аттуу жарандын киши колдуу каза болгондугу, анын башында жаракаты бар экендиги тууралуу маалымат келип түшкөн.

Аталган факты боюнча Кылмыш-жаза кодексинин 122-беренесинин (Адам өлтүрүү) негизинде кылмыш иши козголгон.

Жогорудагы кылмыш иши боюнча шектүү катары маркумдун иниси 2008-жылы туулган Ж.М. аттуу жаран кармалып, убактылуу кармоочу жайга киргизилген.

Учурда кылмыш иши боюнча тийиштүү укуктук экспертизалар дайындалып, тергөө амалдары жүргүзүлүп жатканы айтылат.

Автор: Каныкей Амантаева