"Кабинетиңерге барып үлгүрбөй каласыңар". Акылбек Жапаров министрлерге эскертүү берди

Бүгүн, 15-сентябрда министрлер кабинетинин төрагасы Акылбек Жапаров күз-кыш мезгилине даярдык боюнча жыйын өткөрдү.

Анда өкмөт башчы министрлерге катуу эскертүү берди.

"Кышка даярдык 100 пайыз болушу керек. Былтыр Майлуу-Суу шаарында болгон окуя сыяктуу жагдайлар дагы кайталанса дароо жумуштан бошойсуңар, ал тургай кабинетиңерге барганга жетишпей каласыңар", - деди Жапаров.

Ошондой эле ал электр энергиясын үнөмдөө боюнча элге түшүндүрүү иштерин жүргүзүүнү тапшырды.

Эске салсак, Жалал-Абад облусунун Майлуу-Суу шаарында катуу сууктан улам өткөн кышта суу кампасындагы түтүктөр тоңуп, андан соң отканаларга суу толук келбей, жылуулук берүү үзгүлтүккө учураган. Мындан улам калаада өзгөчө кырдаал режими киргизилген.

Автор: Бек Оморбеков
Фото: Министрлер кабинетинин басма сөз кызматы