Неймар, Малком ойноду. "Аль-Хиляль" өзбекстандык "Навбахорду" жеңе албай калды

Кечээ, 18-сентябрда сауд арабиялык "Аль-Хиляль" командасы менен Өзбекстандын "Навбахор" командасы Азия Чемпиондор Лигасынын биринчи турунда оюн талаасына чыгышты.

Эр-Рияддын Фахд Падыша атындагы стадиондо болгон оюн 1:1 эсеби менен жыйынтыкталды. Оюндун алгачкы голун "Навбахордун" оюнчусу Тома Табатадзе 52-мүнөттө киргизди.

Ал эми "Аль-Хиляль" командасынын курамында атактуу футболчулардан Неймар, Малком жана Александр Митрович оюн көрсөтүштү. Сауд арабиялык клуб 100-мүнөткө чейин гол жарата алган жок. Андан соң Али Аль-Булайхи эсеп санын теңдей алды.

Эми командалардын жооптуу оюну 28-ноябрда Өзбекстанда болмокчу.

Эске салсак, бүгүн, Е тайпасындагы "Аль-Наср" клубу менен ирандык "Персеполис" клубу оюн талаасына чыгат.

Автор: Ширин Марат кызы