"Мектепте акча чогулткандарга айып салынат". Мыйзам долбоору коомдук талкууга коюлду

Жогорку Кеңештин депутаты Миргүл Темирбаева мектептерде окуучулардан мыйзамсыз акча чогулткандарга айып пул салууну сунуштоодо. Мыйзам долбоору парламенттин сайтында коомдук талкууга коюлду.

Ага ылайык, мектепте каражат чогулткан жеке жактарга 7 500 сом, коомдук фонддорду түзүү жолу менен жыйнаган жеке жактарга 10 миң, юридикалык тараптарга 28 миң сом айып пул салуу сунушталды.

"Мыйзам долбоору мектепте акысыз билим алуу укугун камсыз кылууга жана мыйзамсыз акча чогултууларды, анын ичинде мектептерде коомдук фонддорду түзүүнү болтурбоого багытталган", - деп жазылат анда.

Долбоор президенттин “Балдардын акысыз мектепте билим алуу укугун ишке ашыруунун мамлекеттик кепилдиктерин камсыз кылуу боюнча чаралар жөнүндө” жарлыгына ылайык иштелип чыккан.