Министрлер кабинетинде өлкөнүн сейсмологиялык коопсуздугун камсыздоо маселелери талкууланды

Министрлер кабинетинин төрагасы Акылбек Жапаров БУУнун Кыргызстандагы туруктуу координатору Антье Гравени кабыл алды. Бул тууралуу Министрлер кабинетинен билдиришти.

Маалыматка караганда, тараптар өлкөнүн сейсмологиялык коопсуздугун камсыздоо маселелерин талкуулады.

Акылбек Жапаров бир катар өлкөлөрдө жер титирөөлөрдүн катастрофалык кесепеттери техногендик процесстердин алдын алуу жана минималдаштыруу боюнча мамлекеттик чаралардын комплексин талап кыларын белгиледи.

“Биз үчүн эң башкысы жарандарыбыздын коопсуздугу, ошондуктан мамлекет тарабынан имараттардын жана курулуштардын сейсмикалык туруктуулугун текшерүү боюнча чаралар күчөтүлүп, бул багытта мамлекеттик комиссия иш алып барууда. Бирок алдыдагы курулуш технологияларын киргизүүгө мүмкүндүк берүүчү курулуш секторун системалуу жаңыртуу боюнча конкреттүү милдеттерге көңүл буруу милдети турат”, - деди Акылбек Жапаров.

Ага ылайык, ал сейсмикалык жүктөрдү эсептөө жана долбоорлоо алдындагы изилдөөлөр боюнча өзүнчө илимий-изилдөө иштерин жүргүзүү, ошондой эле учурдагы ченемдик укуктук жана техникалык базаны өркүндөтүү зарылдыгын белгиледи.

"Ал эми Антье Граве өлкөнүн сейсмологиялык коопсуздугун камсыздоого багытталган долбоорлорду биргелешип ишке ашырууга даяр экенин билдирди жана бул жаатта БУУнун түзүмдөрү 3 негизги – туруктуу турак жай курууга, шаар курууга жана курулуп жаткан имараттарды пландаштырууга багытталганын белгиледи. Ал белгилегендей, мамлекеттик органдар менен биргеликте бул багыттар акыркы чакырыктарды жана тобокелдиктерди эске алуу менен деталдуу каралат", - деп айтылат маалыматта.

Автор: Гүлкайыр Абдиманнап кызы