Мамлекеттик өнүктүрүү банкынын ишинин маселелери боюнча айрым мыйзам актыларына өзгөртүүлөр киргизилди

Президент Садыр Жапаров “КР Мамлекеттик өнүктүрүү банкынын ишинин маселелери боюнча айрым мыйзам актыларына өзгөртүүлөрдү киргизүү жөнүндө”мыйзамга кол койду. Бул тууралуу бүгүн, 6-октябрда президенттин маалымат кызматынан билдиришти.

Мыйзам ушул жылдын 4-октябрында Жогорку Кеңеши тарабынан кабыл алынган.

Мыйзам “КР Мамлекеттик өнүктүрүү банкы” ачык акционердик коомунун ишин натыйжалуу башкарууну жогорулатуу максатында иштелип чыккан.

Мыйзам менен Кыргызстандын экономикасынын артыкчылыктуу жана стратегиялык тармактарын өнүктүрүүгө жана стимулдаштырууга багытталган Мамлекеттик өнүктүрүү банкынын ишинин максаттары, түптөөнүн укуктук жана уюштуруучулук негиздери такталган, ошондой эле кошумча функциялар берилген. Ушуга байланыштуу Мыйзам менен КР Граждандык кодексине, “КР Мамлекеттик менчикти менчиктештирүү жөнүндө”, “Акционердик коомдор жөнүндө” жана “КР Мамлекеттик өнүктүрүү банкы жөнүндө” КР мыйзамдарына өзгөртүүлөр каралган.

Автор: Максуда Кудайбердиева